2023年係難忘嘅一年，首先喺二月初我哋拎到永久居民身份，所以妹妹喺四月出世嘅時候可以直接拎到澳洲護照，成為真正嘅澳洲人。
五月嘅時候，父母由香港嚟澳洲探我哋，順便嘗試一下澳洲嘅生活，如果適應嘅話就考慮申請佢哋過嚟。可惜爸爸始終唔慣呢邊嘅生活，唔識揸車亦都好唔方便，所以將呢個計劃暫時擱置。反而阿媽適應得幾好對於呢邊嘅食物環境生活都好似幾適應，所以好快就book咗另一次嘅旅程再嚟多一次澳洲，阿爸就喺嗰段時間會獨自留喺香港。
喺妹妹出咗世之後我哋不停咁樣去睇樓，希望可以盡快買到自己嘅物業。而喺七月頭有一次揸車出去睇樓嘅時候俾人打橫咁撞埋嚟，架車要拎去大整。好在有朋友介紹相熟嘅車房放心俾佢用返原裝嘅零件大維修同埋安排租車嘅事。經過整整三個月嘅維修架車終於可以喺10月用得返。而我哋亦都喺八月尾成功買入我哋第一間澳洲嘅House，跟住落嚟嘅就係如火如荼嘅裝修。喺原本裝修到7788嘅時候先至發現一啲舊有嘅廁所，我哋原本諗住唔裝修，但係原來係漏水嘅直至就係要重新開始拆晒個廁所再嚟多一次。結果到12月中終於見到直路，月尾就會收返間屋可以正式搬入去啦。