兩年前(2020)嘅八月，因為太太收到海外嘅Offer，展開左我哋移民之旅，我亦都開始寫呢個blog去記錄生活上關於移民嘅一點一滴。喺國安法通過之後，2020年7月英國宣布BNO Visa正式可以喺2021年嘅一月申請。當時我嘅預計係好多人將會喺2021至2022年左右移民英國。而佢哋靠乜嘢生活？佢哋會唔會再返嚟香港？佢哋會唔會將自己畢生嘅投資放喺香港？當時我嘅結論係應該會有大量人賣樓離開香港。
另外，以前一個好重要撐起香港樓市嘅因素就係大陸資金。原因係大陸人可以好放心咁將佢哋嘅錢調入去香港樓市度當一個錢罌咁用。佢哋根本唔介意佢比一個Premium去買樓，因為大家都知道錢離開咗中國先至係自己嘅。國安法將呢一道平衡破壞，假如我係呢啲大陸人當然就係會賣樓拎返舊錢放喺星加坡啦。
第三個因素我當時冇預計嘅就係美國嘅高通脹，因此聯儲局喺2022年不停加息，香港嘅銀行亦都開始頂唔住要跟隨聯儲局加息。呢樣嘢令到香港嘅樓市雪上加霜。好多就算唔走嘅人本身諗住買樓而家都會停低再諗諗。而想買樓移民嘅人通常會有一個限期俾自己，呢一個Hard deadline亦都令到香港樓市變成一個買家嘅市場。
再加上香港政府喺兩個月前取消咗0+3嘅COVID檢測入境限制，令到好多海外嘅香港人可以唔使隔離返番香港。我聽過唔少case係朋友嘅爸爸媽媽喺早期COVID嘅時候離開咗香港，呢兩年香港嘅發展令到佢哋覺得唔應該再手持香港物業。而取消0+3嘅政策就為佢哋提供一個返香港賣樓嘅機會，呢一班人手持嘅物業通常都已經係20至40年前買落手頭上有不少減價空間。當香港樓市嘅寒冬遇上呢一班手頭上有本錢減價嘅人想套現，結果當然就係進一步下調。 雖然我冇絕對嘅證據支持，但係從時間上可以睇得出樓市呢兩個月嘅急跌其實同呢個0+3政策時間上係非常吻合。
有朋友上年收到澳洲嘅GTI Visa本身諗住舉家過嚟，但結果因為唔捨得份工想搵多年錢，所以將移民計劃推遲一年。 如果佢上年可以決心離開， 比Double Stamp Duty 早啲斬纜走人，可能要輸100萬。相比起而家淨係帳面上都蝕咗3,000,000 ，仲未計下年應該仲有唔少嘅跌幅。（根據高盛估計下年香港樓市應該會再有20至30%下調空間）
總括嚟講，雖然我哋賣樓嘅時間距離樓市最高點大約有半年，我對於當時賣樓嘅決定尚算滿意。因為人總唔能夠捕捉到市場嘅最高一刻。能夠認清個趨勢，避開大跌市，已經非常感恩。 香港人成日話跟李嘉誠就一定冇錯，事實上李嘉誠喺反修例事件之前已經賣出中環中心，能夠坐言起行跟住李嘉誠走嘅其實並唔容易。