由2020年8月準備我哋嘅移民，到而家大約兩年半，大部份嘅事情都係我原本預計之內順利進行。例如： 講喺香港樓市向下之前賣樓拎cash；轉一份可以離岸工作嘅工，一半時間照顧小朋友同埋屋企事務，一半時間搵錢；盡快係幾年內由工作Visa轉去永居Visa； 穩定落嚟之後生第二個小朋友等等。
到咗今日以上嘅plan嘅最後一項item經過大概四個月嘅等待，終於收到移民局嘅PR visa grant。 有咗澳洲嘅永居權，咁買樓就唔使比多8%嘅稅，小朋友返學亦都唔需要交學費，太太搵工亦都唔需要比而家嘅雇主綁住。而且將會喺兩個月後出世嘅BB 更加可以即刻拎到澳洲Passport。呢個PR Visa可以話係嚟得非常及時。
而當呢啲目標一一實現之後，係新一年睇嚟要有一啲改變去適應新嘅挑戰。首先，因為新小朋友嘅出現，好大機會我將會轉去part-time，要預留更多時間俾屋企。 另外而家澳洲係加息周期入邊，樓市開始平穩向下，係時候多啲睇樓，準備好見到間啱心水嘅可以隨時買得。第三，太太係產假之後好大機會會出去私人市場，到時嘅生態環境可能要重新適應。 最後，阿妹喺上個禮拜過咗嚟澳洲準備讀書之後留低，香港嗰邊就剩返阿爸阿媽自己喺度，最理想嘅就係等佢哋過嚟探我哋嘅時候，短住一排睇吓有冇可能適應呢邊嘅生活。如果OK嘅，咁就同佢哋申請父母Visa等佢哋可以過嚟一齊住咁就最理想。