今年好懶比較少update。當我想再寫一篇新文章嘅時候發覺原來個blog已經update唔到。原因係當年寫呢個blog嘅Technology已經好多update咗有啲package甚至已經冇再maintain。咁我索性就將呢個當係一個試用AI去重寫一個blog嘅機會。結果只係花咗兩三個鐘就用Google Gemini將原本舊嘅Gatsby website用Astro重寫一次。可以預計未來幾年AI嘅發展係會繼續爆炸式嘅成長。
===================
2025年年頭搞完晒外母嘅喪事之後同阿姨姨丈去咗轉大阪散吓心，帶住隻一歲嘅BB去旅行完全唔簡單好彩有阿姨幫吓手。老婆一向唔好名牌，但係今次去到就買咗兩個袋，主要係洗吓錢買吓嘢令到自己冇咁傷心。我亦都乘機訂咗部新嘅4080電腦用嚟玩吓AI打吓機。
由日本返嚟冇耐，我哋就同朋友去咗個Roadtrip去Port Stephen。有一班人一齊揸吓車吹吓水，去吓海灘玩吓沙，夜晚就喺B&B打吓邊爐飲下酒，叫做可以幫老婆分散吓注意力冇咁傷心。
返到嚟Sydney之後，老婆繼續想用消費去發洩結果差少少買咗架新車，最後解決嘅方法係買一座鋼琴，又可以使錢，又可以彈吓歌抒發心情，都未嘗唔係一個好嘅選擇。
八月中左右，我公司終於因為VC cut budget而唔夠cashflow將全部engine cut晒，轉去Survive mode嚟賣盤。呢件事其實一早我已經預咗當初join呢間公司嘅時候佢話夠錢夠burn兩年，結果而家係四年幾有多，算係超額完成。慶幸嘅係喺幾年前開始一路佈置嘅投資組合今年有非常唔錯嘅成長，甚至係首次回報超越我嘅年薪，希望未來再可以穩定增長咁就可以慢慢實現我嘅財務自由計劃。
到咗九月尾10月嘅School holiday，我哋又返香港順便去一去九州，今次帶埋阿媽去咗九州一個星期自駕遊。大野去到咩都話要食咩都話要買，細嘢就去到咩都唔食，淨係飲益力多同果汁。最令我難忘嘅係去Glamping睇星星（雖然澳洲都有。。。）同埋去久留米食蟹宴。全餐飯都係用蟹嘅唔同部位用唔同嘅煮法嚟做，非常好味，而且價錢仲一啲都唔貴。返到香港最令我開心嘅就係約到20幾年麻雀腳，由早餐到晚餐打咗10幾圈。呢班朋友由細識到大一齊打機一齊打牌，你串吓我，我窒吓你，咁就廿幾30年，由全部都係靚仔，到到而家一家大細要就晒所有人全日出嚟真係唔係咁容易，要好好珍惜。
嚟到年尾，香港同悉尼呢兩個分別對我最重要嘅城市都發生咗一啲令人傷心嘅事件。香港大埔宏福苑發生超級火災死咗百幾人，成個屋苑嘅人都無家可歸。最令人憤慨嘅係呢一單人和根本就係可以避免嘅。係火警發生之前其實已經有唔少人去有關當局投訴，話宏福苑大維修所用嘅物料有問題，而香港有關部門一直當冇事發生得過且過。而燒死咗百幾人之後，先至嚟喺商界度拉人，但係政府裏面冇一個部門冇一個官員要為呢件事負責。而喺網上法文要求追究責任嘅人仲比香港政府以國安法拉咗，話佢煽動，簡直係荒謬之極。有朋友覺得宏福苑呢單大火會令到更多人移民，我反而唔係幾同意，因為要走嘅一早都走咗。先問如果2019年咁大嘅事都唔走，又點會單單為咗一件火警事件而離開。可能係我悲觀，但我估呢件事好快就只會係大家心中一個回憶，而實際上生活依舊，制度依舊，政府依舊係你死你嘅事。可憐嘅只係受火災影響到嘅人，住喺獨裁政制之下，你唯有希望中招嘅唔會係你自己。喺悉尼呢邊，發生咗幾十年來最嚴重嘅槍擊事件。有兩個槍手喺Bondi 海灘喺猶太人嘅光明節向人群開槍，殺死咗15人。最後其中一個槍手比差人擊斃，另一個重傷。同香港一樣，悉尼嘅民間喺發生咗慘劇之後好多人自發去幫手，去捐物資，去捐血。但係同香港唔同嘅係，呢邊嘅政府喺輿論壓力之下成立一個調查委員會開徹查成件事嘅因由，同埋睇吓點樣可以改善同避免下一次發生同類事件。當我望住呢兩件事發生嘅時候，我就知道我哋離開香港嘅決定係冇錯。