搬屋煩, 移民更煩, 疫情中移民更加難搞. 原因係澳洲封鎖邊境, 非永久居民本身己經唔係個個可以入去. 放你入去既仲要自費3000澳元住14日酒店. 由四月起入去住既人個個喊哂口.
正常黎講梗係去一轉當地搞掂銀行, 住居, 同其他垃垃雜雜野之後先帶埋老婆仔女一野飛過去. 而家整個14日隔離即係迫你一炮過無NG直落搞哂佢. 好在網絡時代應該租屋可以上網搞掂, 其他野唯有靠朋友. (我同太太當地朋友每人識一個咁大把…)
另一個問題就好現實, 去到澳洲收入大跌. 預計太太收入得番40%. 佢去番工我做住家男, 還好做Software要搵Home Office remote 既parttime應該唔太難. 到Settle down一排小朋友番學既話咁可以變成Fulltime都仲得. 其實呢個Topic係之前都同太太討論過不下一次, 大家都有共識就係開頭捱下, 換來既係小朋友一個相對開心既學習成長環境, 安全既食物質素同埋自由體制既保障都叫值回票價.
作為毒男一個我自己洗費不大, 過到去平日主要活動應該離不開湊仔, 家務, 打機, 睇書, 郊遊. 主要開支就係學費(因為未係PR), 食, 車, 租屋. 慳慳地一家人一齊己經好滿足.
好多人都勸告他人話唔好對移民有乜浪漫既幻想, 否則會好痛苦. 呢個睇法我絕對讚同, 而去前我地亦清楚知我地要求既野(教育, 食物安全同民主體制)並唔係水中月, 只係一個正常文明社會可以比我地同小朋友發展既空間, 所以我有信心可以適應既. 至於係咪真係如我所願就要過幾年先知了…