兩日前快手𧶠出自住單位, 話口未完政府又出招救非住宅, 增加非住宅可造按掲成數.
喺2020年既香港, 經濟向下行, 疫情未搞掂, 失業人數上昇, 外資公司準備撤走, 國安法隨時充公資産, 財赤數字見新高. 到底有乜因數係值得人放錢入去工商物業? 除左要吸引水魚接貨, 又或者比啲工商鋪業主可以向銀行借多啲錢之外完全係無根無據既決定.
早排新聞話政府用左2900億搞抗疫, 係, 無睇錯, 2900億! 除左派左一萬蚊我見唔到有乜係幫到小市民. 保就業基金有大量0僱員既公司照拎到. 大財團就當然億億聲咁拎.
太太仲對自住個單位有唔捨得, 但對住個咁既政府如果將成世人最大舊既資産仲放係香港真係實在太戇居. 唔使好耐香港政府必定會燒光香港儲備, 到時仲可以唔加稅? 仲有大量公職人員難逃減薪 (當然某啲垃圾行業例外), 再引入強國醫護教師等, 諗下都覺得頭痛.
咁你話OK我做香港最搵錢既金融行業唔怕. Sorry美國己經擺明會追殺香港上市既中國巨企, 唔會比佢地再利用香港黎吸美金. 香港金融在於中國正正好似當年蘇聯既石油管道, 一日比佢留係度, 一日蘇聯都可以賣石油為生. 結果係點大家都好清楚.