古時候打仗話”三軍未動，糧草先行”，現代戰爭亦都係先要確保物流保給線搞掂至會出擊。
意思其實就係所有重大決定都必要有全盤計劃，免得餓死。 移民係人生中最重大決定之一，影響到既唔止自己下半世命運，更加係全家人前途既一個賭局。所以當然將不確定性降得越低越好。“糧草先行”至為重要。
由於2019年香港情況令人擔心，再加上近排美國開始使用香港人權法制裁港奸令全港銀行人人自危。所以就算唔移民，其實不少人己經默默將流動資金放去離岸戶口。而我同太太亦分別將大部分流動資金放到海外。
餘下最大問題就係層樓。香港樓市己經連昇十幾年，中間有不少大陸資金流入。睇中既就係香港既一國兩制，啲錢唔會無啦啦送中。所以即使比個溢價都要衝黎香港買樓。而家國安法己立，保護網穿了個大洞，錢還會久留嗎？
加上香港現時經濟低迷，不少外國公司己經決定撤離香港，問題己經變成係”幾時走”而唔係”走定唔走”。如此情況下香港樓市點會有運行？
因為預計離開日期為下年年頭，應該會撞正BNO 5+1。預料將會有大量沽盤湧到市場，所以我地決定即使VISA仲係申請中未完成批核，但亦要加快賣出自住物業，避免之後更多人要逃離時賣樓人踩人。（其實主要係我堅持，太太係有啲唔捨得層樓既。。。）
我地手上層樓買落都有幾年有一定昇幅，所以係有減價本錢去快啲賣出。呢種時勢我情願平少少當比個保險費早啲拎番CASH好過第日有機會要減更多。錢係賺唔盡既。。。
希望第日我唔會後悔。