昨天帶著小朋友到朋友家小聚, 一向對時事不聞不問的離地朋友竟然第一句就係”黎智英比人拉左!”. 跟住我地既話題變到離不開香港前途和移民. 在我心目中呢位朋友有著指標性既作用, 佢代表住香港搵錢能力高既離地中産好像終於意識到香港好似再唔係可以長久安居既地方. 而他亦當然不知道十多小時後連代表住最和理非既周庭都將會比人拉埋, 我好難估計佢知道後既震憾有幾大.
你可以話呢啲離地中産後知後覺. 無錯的確佢地係, 但同時亦不能低估佢地既執行力, 呢班人可以係一個世界大都會中成為精英絕對不是靠運氣. 他們有知識, 有資金, 有人際網絡. 過往可能只係將自己一生精力放係事業上而忽略了其他事物, 而如果他們夢醒了行動起上黎唔係講笑, 一定會快恨準. 香港流失人才同資金既速度絕對會再度加快.
長久以來香港碓係一個搵錢既好地方, 人工高, 資金多, 稅低. 在當局中的人很容易因為以上原因放棄了更多人生中有意義既事情而迷失在金錢物質世界之中. 這亦是黎智英更令人敬佩之處.
還記得幾年前太太問過我一條問題: “幾時先應該走?”. 我當時既答案係: “蘋果日報收檔之日, 就係離開香港之時”. 當時估計距離呢一日尚有一段時間, 想不到如此一刻竟然這麽快來臨. 雖說蘋果日報並未完全摺埋, 但大家都知情況極不樂觀.
唯一”安慰”既係當時估不到香港在蘋果危難之時會有國際關注, 連美國副總統, 國務院, 和議員也迅速出聲明. 這當然要多得過去一年反送中運動附出的所有人, 多得全世界比肺炎搞到雞毛鴨血, 多得戰狼加速主義. 但觀乎現今中美情況, 雙方也没有退路. 中方讓步必令小粉紅驚覺原來自己信奉的強國夢只是精神鴉片, 這對中方管治權威有極大傷害, 什至有覆亡之險. 同時美方早己拉攏大量盟友聯手圍搗中國, 如果讓步又如何在國際舞台立足? 另外南海/台灣情況亦不斷昇溫, 整個東南亞地區未來既情況並不樂觀. 天佑香港人.