仲記得剛出來做野時, 第一份工係入HSBC寫COBOL. 幫佢個仲用緊AS400既保險系統加FEATURE…
做左唔夠一個月頂唔順太戇鳩走人. 當時屋企人梗係唔多鐘意啦. 做乜野有大公司唔做要走, 上一代人既諗法係要做大銀行, 做政府先安全. 十多年過去, 而家HSBC基本上大部分野外判哂去印度, 如果仲留係果度應該己經知比人炒左幾多次, 又或者等死中.
好喇, 咁唔打HSBC工之後我記得有長輩同我講: “唔做HSBC既員工無乜所謂, 第日有錢做佢既股東”. 當時我一聽又覺得有道理喎, 有錢就買下HSBC. 08年HSBC跌到30幾蚊買左啲, 好在90蚊左右走人. 唔係又係得個吉. 明顯地HSBC想擴充但歐美唔掂, 脫離唔到主要淨係靠香港呢個事實. 上一代人既”聖誕鐘買匯豐”既諗法無可能係現今既情況下再有用.
OK, 咁唔做員工唔做股東, 淨係做客用下得喇呱. 如事者用了HSBC多年, 你老味而家佢去凍結星火, 支持國安法, 搞鳩肥佬黎同蘋果既戶口. 卒之引出美國國務卿點名批評. 而家美國出埋warning, HSBC 仲唔好自為之既好快就會比人放入制裁名單. 到時連客都唔使做.
本身諗住HSBC GLOBAL BANKING可以方便運錢去澳洲準備移民. 而家咁搞分分鐘要整多個BACKUP PLAN. 係香港開離岸不外乎DBS, CITI再唔係就証劵行如FIRSTTRADE. DBS 有朋友問過嚴到傻左, 加上DBS犯過既超低級錯誤, 不作考慮. CITI如果經香港GOLD MEMBERSHIP 開要HOLD住150萬HKD 等值既野係香港戶口先幫你搞離岸, 變相又係走唔哂. 正當我係度煩緊既時候突然發現原來CITI Singapore可以直接網上APPLY外地戶口 (link). 咁睇黎係未去到澳洲時將錢先轉去星加坡CITI作為中途站以保安全.
好地地一個香港人曾經引以為榮既品牌, 搞到咁既田地真係好無奈.